Lëtzebuergesch léierenNimm als Wierder. Wousst Dir schonns, datt …

… d’Wuert Mausoleum nom griichesche Satrap (e Statthalter am Perserräich) vu Karien (haut Süd-West-Tierkei) Mausolos benannt ass? No sengem Doud am véierte Joerhonnert viru Christus huet seng Fra him ee pompööst Grafmal opriichte gelooss, dat souguer ee vun de siwen antike Weltwonner ginn ass, d’Mausoleum vun Halikarnassos.

… de Begrëff Chauvinismus nom Nicolas Chauvin, engem legendären Zaldot ënnert dem Napoleon, benannt ass? Hie war d’Bild vum genügsamen Zaldot, deen alles fir seng Natioun ginn huet, a war säit dem Koméidistéck „La cocarde tricolore“ aus dem Joer 1831, an deem e portraitéiert gëtt, d’Personifikatioun vum franséischen Nationalismus an der Léift fir seng Heemecht.

… de Sadismus nom franséische Schrëftsteller Donatien Alphonse François, Marquis de Sade benannt ass? Hien huet vu 1740 bis 1814 gelieft an ass virun allem wéinst senge literaresche Wierker bekannt, an deenen hien d’Loscht fir grausam Akter souwuel vu physescher wéi och vu moralescher Natur an de Genoss dervu beschreift.

… d’kyrillescht Alphabet nom Hellege Kyrill benannt ass? Hien a säi Brudder Method ware griichesch Geeschtlecher a Geléierter an hunn am 9. Joerhonnert d’slavesch Vëlker missionéiert. Wien d’kyrillescht Alphabet erfonnt huet, ass net kloer, mee et ass sécher, datt säi Virreider, d’glagolitesch Schrëft, vun de Bridder Kyrill a Method entwéckelt ginn ass.

… d’Braille, also d’Schrëft fir Leit mat Seebehënnerung, nom Fransous Louis Braille benannt ass? Hien huet dës Schrëft 1825 erfonnt, mat där ee mat enger Kombinatioun vu sechs Punkte maximal 64 verschidden Zeeche kann duerstellen. Dës Punkte gi meeschtens vun hannen an de Pabeier gedréckt, fir datt ee se mam Fanger fille kann.